موضوع الحلاقه مع البقاء في البيت هيقلب محمد صلاح خالص، فعمال افكر في صناعه الحلاقه واحده من اقدم الخدمات ال بيقدمها بشر لبشر، لكنها خلال ١٠٠ سنه تطورها قليل جدا جدا، محدوش اخترع مكنه تلبسها علي راسك تحلقك مثلا؟ مظنوش هتبقي تكنولوجيا صعبه
الجد بقي ان الحلاقين لازم يدرسو فكره زياره البيوت، الاقبال علي الحلاقين هيل جدا، فكل حلاق لازم يعمل اعلانات في منطقته انه بيزور البيت، يجيلك البيت لابس الكمامه و الجوانتي و معاه تعقيمه، اظن ده يحل مشكله. (حد نبهني ان موضوع الحلاقين في البيت عمل مشاكل في ايطاليا فوجب الاحتياط)
الظروف كمان بينت ان في كبار السن كتير في المنارل وحدهم، لازم ابلكوشن تكون مساعد لكبار السن، بيدخل بياناته و عنوانه و الادويه ال بيحتاجها، تقدم خدمات توصيل طلبات و ادويه، تذكره بمعاد الدواء، تطمن عليه كل شويه، تبعت مرافق في مشواير، توضب حجز كريم او اوبر، يبعت عليهم بسرعه رساله استغاثه لو في مشكله. اظن فيها فرص مساعده و مكسب عن طريق اشتراك شهري يدفعه كبير السن او اهله او حتي الجمعيات الخيريه.
التامين يا جماعه، لازم كله يامن، امن ضد فقدان مصدر دخلك، تامين ضد الحوادث، تامين للتحويش، لازم كله يحاول يخلق شبكه امان لنفسه باستخدام اي فائض دخل في الاوقات العاديه ، مثلا انا فاهم فكره تامين بتاع مبلغ تدفعه شهريا و اذا فقدت دخلك بسبب حادث يتكفلون بمصاريف الاولاد و غيره و غيره من المنتجات، الابداع و التوزيع الالكتروني متخطي كل العقبات مهما كانت اصبح ضروره موش حاجه بس منظرها حلو.
التدريب علي اساسيات الرعايه الطبيه اصبح ضروره، لازم منصه الكترونيه تعلم الناس الاسعافات الاوليه، اساسيات الرعايه الطبيه، التعامل مع الادويه، باختصار المعلومات و الخبرات الطبيه للمواطن العالي لازم تزيد اضعاف مضاعفه، منها كمان اصبح اساسي التواصل الالكتروني مع طبيب، لازم منصات معتمده علي الواتس اب او غيره تتيح التواصل مع الدكاتره في اي وقت، انت بتتواصل مع منظومه موش دكتور معين، بس كل دكتور هيتواصل معاك هيظهرله وضعك الطبي فيقدر يرد عليك، هنا medical record اصبح حاجه مهمه جدا
التصنيع الطبي و التوسع فيه اصبح ضروره، اظن انتهي عصر الاعتماد علي الصين في التصنيع الطبي لانها ارخص، محدوش هيقبل تاني ان يحدث نقص في المعدات الطبيه لانها مستورده من الصين، غالبا كل دوله لازم تضمن ان عندها انتاج محلي من اي مستهلكات طبيه يكفي اضعاف احتياجها في الاوقات العاليه بغض النظر عن فرق التكلفه مع الصين....
منقول
