الأربعاء، 30 سبتمبر، 2015

الوهم

النهاردة آخر يوم فالشهر، مُفترض بنزل مُلخص ما استفدته وتعلمته خلال الشهر ده

لكن مش هنزل الملخص، هكتب عن اكتر حاجة استفدتها الشهر ده

الوهم ..
............................
احنا جوانا طموح كبير اوي لكن الواقع مش مساعدنا على تحقيقه، بنلجأ لتحقيقه باسباب اخرى :

- لما بينزل بوست فيه لينكات تعليم انجليزي وانا فاشل انجليزي وطموحي اتعلمه وبدل ما استغل البوست اني

ابدا تعلم بعمله bookmark وبكده ريحت ضميري، وبوهم نفسي اني من المحسنين فاشيره عشان غيري

يشوفه ويستفيد ويتعلم وهكذا ..

- انا نفسي اكون واخد دكتوراه والكل يتباهى بمعرفتي بدل ما اشتغل واتعب واخدها، آجي وسط ناس متعرفنيش

واقول معايا دكتوراه واتباهى بيها ..

- من جوايا وطموحي عاوز انصرالاقصى لكن انا مش قد نصرته، فاعمل صورة باسمي عنده وصورة

مجاهدين القسام وقسامي الهوى، وانا اصلا معرفش اتحمل يومين من غير ماشرب ازازة كوكاكولا او بيبسي ال

هي مقاطعة والف باء نصرة ..

- من جوايا مقتنع تماما ان النظام الحالي فاسد وظالم وقاتل وطموحي اعمل حاجة، لكن آخري اشير صورتي

مع واحد نزل وقف يقول كلمة حق في وجه سلطان جائر واستشهد ..

- بكتب عالفيس بوستات مش هنضيع حق المعتقلين، وانا اصلا مزورتش ام صحبي المعتقل ال ساكنة جمب بيتي..

- بنام واحلم بطموحاتي، اصحى اكتشف الواقع ال محتاج شغل جامد جدا، فاروح ايفنت جميل فيه ناس تعبت

ونجحت فانبهر واروح اكمل يومي عادي جداً ..

- الانبهار بالاشخاص الناجحين الكويسين بيعمل كذا حاجة:

بيخليني اضعهم في اطار الشخص ال مفيش زيه واتفتن بيه + اتخيل انه عنده اسرار فظيعه للنجاح خليته بقى

كده +ياريت انبهاري ده صامت لأ بروح اقوله ومن كتر صدمات الانبهار للشخص بيفسد داخله ويتغر

وتتقلب نواياه ويبدأ رحلة الفتن ويتدمر ..

- انا احسن واحد اجاوب اسئلة غيري في اي حاجة مهما كانت، هل ده معناه اني فظيع وحياتي رائعه؟ لأ انا

بجاوب بس عشان اخلي حياته احسن، طب ماكنت اخلي حياتي احسن طالما انا فظيع كده ..

- الواقع حواليا منيل بستميت نيلة وبوهم نفسي اني من مغيرين الواقع وانا اصلا مش عارف افهم التخصص

بتاع الكلية ال هطلع اشتغل فيه، ال هيا الف باء اهداف حياة اني اتعلم عشان اشتغل كويس واتقن عملي ..


حتى في كتابة البوستات بكتب احنا واتكلم بنون الجماعة عشان اوهم نفسي اني مش لوحدي واننا كلنا بنوهم

نفسنا او اكتب انت واتكلم اني بنفي الكلام عني ..

اعتقد ده هيكون السبب اني اكون ضمن { قُلْ هَلْ نُنَبِّئُكُمْ بِالأخْسَرِينَ أَعْمَالا (103) الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا (104) ..


غالبا الصدمة للنفس بتكون الباب ال هيقفل عليا حججي وارضائي لضميري وتجميلي لذاتي وميكونش قدامي

غير اني انفجر واشتغل، مش مطلوب حاجة صعبة والله ... اشتغل اشتغل وابدأ في طموحي ..

ليست هناك تعليقات:

إرسال تعليق