الأربعاء، 8 يوليو، 2015

اول يوم ليا في الكلية

بكل صراحة يعني :D

كنت اول مرة ادخل الجامعة، مكنتش بحب الزحمة ومكنتش اعرف ناس كتير، اتفاجئت ان الحياة فيها بنات كتير لاني فعليا مكنتش اعرف غير فتاة واحدة كنت معجب بيها وبدور عليها بقالي سنة ونص وقتها، لان قبل الجامعة مكنتش بخرج فالاجازات ولا بلعب مع اصحابي، وبابا كان بيوصلني المدرسة ومعظم الدروس، كنت فاكر ان الناس ال جايبين مجموع عالي دول قليلين، بس لقيتهم كتير اوي في هندسة، كنت خايف اوي وبدور على اي حد اعرفه او اتصاحب عليه عشان استخبه في رفقته من الزحمة..
كنت بحسب طقم الهدوم ال عمو جابهولي هدية هو احسن هدوم فالعالم، بس لقيت الناس كلها لابسة حلو .
لقيت نفسي واقف في اخر صف عشان اسمع اول محاضرة، كنت حاسس اني هتعلم ازاي اغير الكون، وازاي هعمل الشركة ال هشغل فيها البلطجية بتوع منطقتي ال ملقوش شغل حلال، وهتعلم ازاي افرح الناس، وازاي اخلي البنت ال معجب بيها فخورة بيا، وازاي هساعد فلسطين، وازاي هقابل اصحابي ال كانو بيحتقروني ويقولو عليا فاشل واقولهم اني مطلعتش فاشل ..
كنت بفكر كام واحد في ال ٣٠٠٠ واحد دول هيكون هدفه يطلع الاول وينافسني، وكام منهم هدفه يعيش حياته بعد تعب ثانوي، وهنافس كام منهم وهصاحبهم وهتعلم منهم طرق جديدة للتفوق واهداف نبيلة تخليهم يتفوقو ..
لما العميد اتكلم حسيته مش حاسس بالكلام الحلو ال بيقوله، كلامه مش طالع من قلبه ..
كلمة المهندسين هما احسن ناس فالدنيا حسيتها كدابة منه، لانه ببساطة مكنش في نظري ضمن احسن ناس فالدنيا ..
يومها كان اول يوم اسمع كلام علمي احسه مهم جدا لتغيير العالم، لكن انا مش فاهمه.. يومها كان اول يوم احس اني غبي عشان مش فاهم كلام مهم زي ده.. بس فالواقع اكتشفت انهم هما الاغبيا عشان مش عارفين يوصلولي المعلومة كويس عشان اكون احسن واغير العالم للافضل وبالتالي كل ده يكون في ميزان حسناتهم ...

ليست هناك تعليقات:

إرسال تعليق